Атырдьах ыйын 22 күнүнээҕи туругунан, уопсайа 10 730 га иэннээх 9 ойуур баһаарын умуруордулар. Ону тэҥэ 0,5 га иэннээх ойуурга саҥа турбут уоту буллулар. Бу туһунан Экология уонна ойуур хаһаайыстыбатын миниистирин солбуйааччы Андрей Коноплев брифиҥҥэ иһитиннэрдэ.
Күн бүгүн өрөспүүбүлүкэ үрдүнэн 15 ойуур баһаара баар. Уот уопсайа 28 841,5 га иэннээх ойууруылан сытар. Ойуур уотун умуруорууга барыта 400 киһи үлэлиир уонна 1 ойуур баһаарыгар үлэлиир тиэхиньикэ сылдьар. « Суукка устата 3 салгын аала үөһэнэн көтө сылдьан хонтуруоллуур уонна 5 салгын тиэхиньикэтэ уоту умуруорууга сылдьар. Уоту тохтоппут миэстэлэриттэн үлэлээбит тиэхиньикэлэри таһаартыыллар.», – диэн Андрей Коноплев иһитиннэрдэ. Абый, Бүлүү, Үөһээ Халыма, Өймөкөөн, Өлүөхүмэ, Орто Халыма, Нерюнгри, Уус Майа, Эбээн Бытантай оройуоннарыгар уонна Дьокуускай куоракка ойуур баһаарыттан сэрэхтээх буолуу оһуобай эрэсиимэ биллэриллэн турар. Өрөспүүбүлүкэ үрдүнэн регионнааҕы уонна регионнар икки ардыларынааҕы ыксаллаах быһыы-майгы эрэсиимэ олохтонон турар. Ону тэҥэ муниципальнай таһымнаах ыксаллаах быһыы-майгы эрэсиимэ Үөһээ Халыма уонна Өлүөхүмэ улуустарыгар биллэриллибитэ.
Баһаартан сэрэхтээх буолуу кэмэ саҕаламмытын кэннэ өрөспүүбүлүкэ үрдүнэн 769 ойуур баһаара турбута бэлиэтэммитэ. Бу баһаардар турбуттарын түмүгэр 1 503 479,1 га иэннээх сир уокка былдьаммыта. Ааспыт 2021 сыл баччатыгар 1 504 ойуур баһаара бэлиэтэнэн, 7 509 545 га иэннээх ойуур умайбыт.
СӨ Ил Дарханын уонна Бырабыыталыстыбатын пресс-сулууспатын матырыйаалыттан