Өрөспүүбүлүкэ үрдүнэн баһаартан сэрэхтээх буолуу эрэсиимэ биллэриллиэҕиттэн Үөһээ Бүлүү улууһугар уопсайа 12 ойуур баһаара бэлиэтэммит. Аҕыйах хонуктааҕыта этиҥнээх, чаҕылҕаннаах дохсун ардах кэннэ, бу ааһан эрэр нэдиэлэҕэ 6 баһаар тэҥинэн тахсыбыта. Онтон билигин 4 ойуур баһаарын умуруорууга күүстээх үлэ бара турар.
Бу туһунан Ойуур хаһаайыстыбатын салайааччыта, сүрүн лесничэй Павел Викторович Тимофеев маннык иһитиннэрдэ:
- Боотулуу Түҥүгэр тахсыбыт ойуур баһаарыгар Ньурба улууһуттан 25 десантник көмөҕө кэлэн үлэлээбиттэрэ, ону тэҥэ Кырыкый баһаарыттан бэйэбит үлэһиттэрбит тиийбиттэрэ. Кырыкый баһаарыгар ойуур хаһаайыстыбатын үлэһиттэрин кытта нэһилиэктэн мобилизация көмөтүнэн көмөҕө олохтоохтор тахсан үлэлии сылдьаллар. Бэлиэтээн эттэххэ, ойуур баһаардарыгар нэһилиэктэр аҕа баһылыктара суһаллык дьаһанан, олохтоохтортон көмөҕө дьон таһаартаан, уоту улаата илигинэ умуруордулар. Оттон сорох баһаардарга билигин да үлэ бара турар.
Бэс ыйын 24 күнүгэр Кырыкый нэһилиэгиттэн 43 км тэйиччи «Уһун» сиригэр 2 га иэннээх баһаар булуллубута. От ыйын 4 күнүгэр умуруоруллубута. Оттон нэһилиэктэн 7 км тэйиччи Хотуйаҕа 0,30 га иэннээх уот от ыйын 3 күнүгэр турбута, от ыйын 4 күнүгэр бу баһаар иэнэ 12 гектарга тэҥнэспитэ. Билигин номнуо 15 гектарга тиийдэ. Манна икки бастакы күн 31 киһи тахсан үлэлээбит эбит буоллаҕына, бүгүн 67 киһи үлэлии сылдьар.
Үөдүгэй нэһилиэгин Куду учаастагыттан 10 км тэйиччи, Сайылыкка 0,30 га иэннээх ойуур баһаара бэлиэтэммитэ. Үөдүгэйтэн 7 ыччат хомуллан тахсан, түүннэри үлэлээн, тута умуруорбуттара, билигин кэтээн көрөр дьуһуурустуба олохтоон олороллор. Оттон Кудуттан 13 км тэйиччи Сэтэкэн күөлүгэр 1,50 га иэннээх ойуур баһаарыгар билигин 6 киһи тахсан үлэлии сылдьар. Манна Сунтаар улууһуттан 6 парашютист көмөҕө кэлбитэ.
Боотулуу нэһилиэгиттэн 31 км тэйиччи Түҥ сиригэр 5 га иэннээх баһаар бэлиэтэммитэ. Күн бүгүн иэнэ 10 гектарга тиийдэ. Манна Ньурба уонна Үөһээ Бүлүү «Авиалесоохрана» үлэһиттэрэ уонна муниципальнай баһаарынай-быыһыыр сулууспа үлэһиттэрэ, уопсайа 32 киһи уокка утары уоту ыытар үлэҕэ сылдьаллар.
Кэнтик нэһилиэгиттэн 5,77 км чугас, өрүс үрдүгэр Атахха 1,5 га иэннээх ойуур баһаара тахсыбыта. Манна уопсайа 38 киһи тахсан үлэлии сылдьар. Түүнү быһа күүстээх үлэ баран билигин уот арыый да намыраата, салгыы умуруорар үлэ барар.
Харбалаах нэһилиэгиттэн 8,62 км чугас Чыбыыда үрэҕэр тахсыбыт ойуур уотун тута 24 киһи тахсан умуруорбуттара.
От ыйын 3 күнүгэр олохтоох дьаһалта мобилизация биллэрэн, тэрилтэлэртэн ойуур баһаарыгар үлэҕэ дьону хомуйбуттара. Бастакы хомуурга ОДьКХ, Үөһээ Бүлүү дьаһалтата биирдии, М.Т.Егоров аатынан 2-с №-дээх орто оскуолаттан 2, Үөһээ Бүлүүтээҕи техникум 3 киһини үлэҕэ ыыппыттара. Күн бүгүн 105 киһи хомуурга хабыллан ойуур уотун кытта бохсууга үлэлии сылдьар.
Кристина Яковлева