Бүгүн, ахсынньы 16 күнүгэр, А. Г. Прокопьев аатынан история уонна этнография түмэлигэр «Капсула времени — послание для будущих поколений» капсула уурааһына буолла.
Бу капсулаҕа улуус баһылыга Валерий Николаев, баһылыгы социальнай боппуруостарга солбуйааччыта Анна Уларова, Россия Геройа Алексей Петров, байыаннай дьайыы кыттыылаахтарын суруктара, хоһоонноро киирдилэр. Бу капсуланы аны 20 сылынан, Улуу Кыайыы өрөгөйдөөх 100 сылыгар, Үөһээ Бүлүү оройуона төрөөбүтэ 110 сылыгар арыйаллара былааннанар.
Улуус баһылыга бириэмэ капсулатын үөрүүлээх быһыыга-майгыга уһун харайыыга уурда.
Маны таһынан түмэл биир хоһугар «Сэрии дуораана» аудиовизуальнай киин арылынна. Бу киини улуус баһылыга Валерий Валерьевич уонна Россия Геройа Алексей Рафаэлович аалай кыһыл лиэнтэни быһан арыйдылар. Инникитин бу аудиовизуальнай кииҥҥэ оскуола оҕолоро, улахан да дьон сылдьан ыалдьыттыахтара диэн тэрээһин кыттыылаахтара баҕа санааларын тиэртилэр.
Мария Васильева
«Үөһээ Бүлүү» хаһыат