Бу нэдиэлэ устата И.Н.Барахов аатынан 1-кы нүөмэрдээх орто оскуола 6-с уонна 7-с кылаас үөрэнээччилэрэ «Россия – мои горизонты” профориентационнай куурус чэрчитинэн биһиги “Үөһээ Бүлүү” хаһыаппыт редакциятыгар ыалдьыттаан суруналыыс идэтин кытары билистилэр. Оҕолору оскуола учуутала Дмитрий Стручков арыаллаан илдьэ сырытта.
Кууруска оҕолор улуус хаһыатын историятын кытары билистилэр, хаһыат хайдах таҥыллан бэчээккэ барарын, суруналыыс идэтэ туох уустуктардааҕын биллилэр-көрдүлэр. Оҕолор сорохторо улааттахтарына туох үлэһит буолалларын быһаарыммыттар, ким эрэ стоматолог, ким эрэ дизайнер, депутат буолуон баҕарар оҕо кытары баар эбит. Суруналыыс идэтин кытары билсэн элбэх интэриэһинэйи биллилэр диэн саарбахтаабаппыт.
Маннык көрсүһүүлэр оҕо инники идэтин, олоҕун сөпкө былаанныырыгар төһүү күүс буолаллар, хас биирдии идэни сыаналыырга үөрэтэллэр.
«Үөһээ Бүлүү» хаһыат
