2025 сыл 9 ыйдааҕы туругунан, сахалыы киинэлэр 200-тэн тахса мөлүйүөн солкуобайы киллэрбит. Бу 2024 сыллааҕы көрдөрүүнү куоһарбыт. Ааспыт сылга 157 мөл.солк. дохуоту киллэрбиттэрэ.
Бу маннык үрдүк көрдөрүүнү ситиһэргэ «Алдан» диэн анал байыаннай дьайыы кыттыылаахтарын туһунан киинэ бырайыагын кылаата улахан. Уһуллан тахсарын Россия Президенэ Владимир Путин быһаччы өйөөн турар. Бу киинэ көрдөрүүгэ тахсан баран 13 мөл.солк. каассаҕа киллэрэн турар. Бу соторутааҕыта Ю.Н. Озеров аатынан XXI норуоттар икки ардыларынааҕы байыаннай киинэ бэстибээлигэр Евгений Родионов аатынананал бирииһи ылбыта.
Ону тэҥэ бу киинэттэн ураты быйыл тахсыбыт «Диодорова. Против течения», «Кончится лето», «Спид Стар», «Мин аатым Таптал», «Мой парень — Айдол!», «Карина», «Кукушка», «Белый пароход» киинэлэр эмиэ добуочча үбү хомуйбуттар.
Маннык үчүгэй көрдөрүүнү ситиһии төрүөтэ — сахалыы киинэни сайыннарар сыаллаах былааннаммыт, систиэмэлээх үлэни өрөспүүбүлүкэ салалтата эрдэттэн өтө көрөн ыыппыта буолар. Ол курдук, Ил Дархан Айсен Николаев 2020 сылтан саҕалаан сыл ахсын киинэни оҥорон таһаарааччылар ортолоругар судаарыстыба бюджетыттан киинэни сайыннарыыга уонна саҥалыы тыынныырга ананар субсидияны туһанар туһугар сүүмэрдиир куонкурус олохтоон турар. Бу үп бырайыактары олоххо киллэрэргэ, прокакка тахсарга, көрдөрүүгэ улахан көмөлөөх. Ол да курдук, оҕо киинэтэ, анимация, документальнай, уус-уран киинэлэр, сахалыы сериаллар, Россия киинэни устар хампаанньаларын кытары үлэ, киинэ ырыынага, саха литературатын сүдү айымньыларын күөх экраҥҥа таһаарыы, о.д.а. хайысхаларынан үлэ тэтимнээхтик барар.
2020 сылтан 2024 сылга диэри 115,2 сөл.солк. суумалаах 38 бырайыак маннык өйөбүлү туһаммыт. 2024 сылга сахалыы киинэлэр 30 араас дойду киинэ пуорумнарыгар 100-чэкэ наҕарааданы ылан тураллар.«Биһиги салгыы да өрөспүүбүлүкэҕэ саха киинэтэ сайдарыгар өйөбүлү оҥоруохпут уонна саҥа айымньылаах үлэ ситиһиилээх буоларын туһугар сөптөөх усулуобуйаны тэрийиэхпит. Сахалыы киинэни таптыыр, сөбүлээн көрөр хас биирдии киһиэхэ махтанабыт», — диэн Айсен Николаев бэлиэтээн эттэ.
Ил Дархан уонна Бырабыыталыстыба пресс-сулууспатын матырыйаалыттан тылбаастанна.