Тохсунньу 3 күнүгэр, саха норуота сайдар суолун түстээбит, тыһыынчаннан киһиэхэ олоҕун тупсарар үлэҕэ олоҕун анаабыт Клавдия Ильинична Максимова-Сайыына арыйбыт Духуобунас киинин салайааччыта Потапова Домна Прокопьевна, үлэһитэ Марина Ивановна Ушницкая, бу киин иитиллээччилэрэ сахаларга эмиэ биир сүдү киһибит, сахалыы эйгэлээх «Айыы кыһата» гимназия салайааччыта, айылҕаттан айдарыылаах учуутал, Саха сирин үөрэҕэриитин үтүөлээх үлэһитэ, Лидия Петровна Шамаева уонна Саха сирин суруйааччыларын союһун чилиэнэ, поэтесса, суруйааччы, бу соторутааҕыта тахсыбыт, республика уонна бүтүн Россия ааҕааччытын биһирэбилин ылбыт «Сайыына» кинигэ ааптара, Любовь Матвеева-Сүүмэх Балаҕаннаах оскуолатын учуутулларыгар, администрациятыгар үөрэх уонна культура хайысхалара биир ситимҥэ киирэн үлэлээтэхтэринэ, оскуола үлэтигэр-хамнаһыгар, үөрэнээччи ситиһиитигэр, төрөппүттэр түмсүүлэригэр, учууталлар таһаарылаах үлэлэригэр хайдах курдук туһалаахтык дьайбытын туһунан, «Айыы кыһата» гимназия Сайыына аатынан духуобунас киинэ бииргэ, ситими быспакка сүүрбэттэн тахса сыл үлэлээбит үтүө ситиһиилэриттэн үллэһиннилэр.
Балаҕаннаах оскуолата сиргэ тэҥнэммэт баай бэлэх быһыытынан ылынан, бэрт сылаастык көрсөн, үтүө учуутал этэр тылын-өһүн сыыска-буорга түһэрбэккэ, бэрт иҥсэлээхтик сэргээн истэн, иҥэринэн бардылар.
Бу үлэ, Балаҕаннаах нэһилиэгин баһылыга Степан Иванович Дмитриев көҕүлээһининэн, культура, үөрэҕирии, тыа хаһаайыстыбата, нэһилиэк администрацията бары холбоһон биир кэлим үлэлэһэр «Өй-санаа, сиэр-майгы сайдыыта» Программатын салҕыыр тэтиминэн, Анна Иванова ыытар «Школа ответственного родителя/Болҕомтолоох төрөппүт» бырайыак чэрчитинэн ыытылынна.
Балаҕаннаах оскуолатын дириэктэрэ, Одунча Чаҥый «Айыы кыһата» гимназия дириэктэрин, Лидия Петровна Шамаевалыын инникитин сөбүлэҥ түһэрсэн, методическай үлэттэн саҕалаан сайыҥҥы лааҕырдарга тиийэ бииргэ үлэлэһэргэ олук уурдулар.
«ТОЛКуй» коммерческайа суох эбии үөрэҕэрии киинин салайааччыта Анна Иванова:
«Чахчы да дьонум-сэргэм туһа диэн олохторун олук уура сылдьар үтүө үлэһиттэргэ, биир күн кэлэн туһалаах үлэни ыытаары, тыһыынчаннан килэмиэтири ахсарбакка, бириэмэбит суох диэн аккаастаммакка, кыра тыа сирин сайыннарар суолбун-ииспин өйөөн, өйдөөн кэлбиттэригэр сиргэ диэри төҥкөйө ытыктыыбын, махтанабын!» — диэн бэлиэтээн этиннэ.