«Утумнааччы уонна уһуйааччы-2023» сыл түмүктэммитинэн олунньу 16 күнүгэр Дүллүкүтээҕи сынньалаҥ киинигэр үөрүүлээх тэрээһин буолла.
Бу үөрүүлээх бэлиэ күнҥэ Дүллүкүтээҕи «Кустук» оҕо саадыгар өр сылларга үтүө суобастаахтык оскуолаҕа киириэн иннинээҕи саастаах оҕолору үөрэтиигэ, иитиигэ үлэлээбит бэтэрээн үлэһиттэрбитин өрүү үөрүүбүтүн тэҥҥэ үллэстэр үтүө — мааны дьоммутун ыҥырыы ыытан ыҥырдыбыт.
Үөрүүлээх түгэни дохсун ытыс тыаһа доҕуһуолунан Татьяна Ботакова арыйда. Салгыы «Кустук» уһуйаан салайааччыта Лена Васильевна Никифорова эйэҕэс эҕэрдэтин ветераннарыгар, уһуйаан үлэһиттэригэр уонна төрөппүттэргэ анаата. Ол курдук, ветеран педагогтарга Гаврильева Карпиена Илларионовнаҕа, Дорофеева Людмила Николаевнаҕа «Ветеран-наставник» өйдөбүнньүк бэлиэлэри уонна махтал суруктары туттарда. Араас кэмнэргэ үлэлээн ааспыт күндүтүк саныыр ветеран үлэһиттэрбитигэр Докторова Мария Никитичнаҕа, Алексеева Лидия Андреевнаҕа, Никифорова Саргылана Васильевнаҕа, Захарова Евдокия Николаевнаҕа ыҥыран чиэстээн тыыннаах сибэкки дьөрбөтүн, махтал суруктары туттардыбыт.
Бөлөхтөргө оҕо оонньуура ылыналларыгар уһуйаан администрациятын аатыттан сертификат туттарылынна, ону таһынан Үөһээ Бүлүү үөрэҕин управлениятын начальнига Борбуев Спиридон Олеговичтан, Үөһээ Бүлүү физкультура уонна спорт управлениятын начальнига Николаев Егор Алексеевичтан, «Дүллүкү нэһилиэгэ» МТ баһылыга Романов Николай Петровичтан, Дүллүкү орто оскуолатын директора Егоров Тихон Александровичтан, уһуйааммыт ситиһиилээх үлэһиттэрэ Бочуоттаах грамота уонна сибэкки дьөрбөтө ылан үөрдүлэр-көттүлэр.
Бу киэһэ ырыа ылбаҕайа ылланна, үҥкүү кэрэтэ тэлээрдэ, сыаҥка мааныта оонньонно.
Оҕолуун, улаханныын бары астынан — дуоҺуйан тарҕастыбыт.
Бука бары үлэҕитигэр ситиһиини, дьиэ кэргэҥҥитигэр или — эйэни, дьоллоох олоҕу баҕарабыт!
«Кустук» уһуйаан кэлэктиибэ