Ыам ыйын 27 күнүгэр, Арассыыйаҕа библиотека күнүн чэрчитинэн, Дьокуускай куоракка Саха сирин национальнай библиотекатын устуоруйа саалатыгар, үрдүк өрөгөй тэрээһинэ буолла.
Бу үөрүүлээх бэлиэ түгэҥҥэ библиотека дьыалатын сайдыытыгар чулуу үлэһиттэри чиэстээтилэр. Олор истэригэр Үөһээ Бүлүүтээҕи нэһилиэк библиотекаларын ситимнэрин Өргүөттээҕи модельнай библиотекатын сэбиэдиссэйэ, СӨ култууратын туйгуна Ирина Ильинична Захарова «Саха өрөспүүбүлүкэтигэр библиотека дьыалатын сайдыытыгар кылаатын иһин” анал бэлиэнэн, улуустааҕы О.Д. Фёдорова аатынан киин модельнай библиотека ааҕааччылары кытта үлэлиир киинин кылаабынай библиотекара, СӨ култууратын туйгуна, Үөһээ Бүлүү улуһун култууратын бочуоттаах бэтэрээнэ Дария Николаевна Павлова «Саха өрөспүүбүлүкэтин култуура тэрилтэлэрин бастыҥ үлэһитэ» анал аат хаһаайына буолан СӨ култуураҕа уонна духуобунай сайдыыга миниистирэ Афанасий Иванович Ноевтан үрдүк наҕараадалары туттулар.
Күндү убаастыыр коллегаларбыт, эһиги идэҕитигэр бэриниилээххитин, өр сыллаах таһаарыылаах үлэҕитин үрдүк наҕараадаҕыт туоһулуур. Эһигинэн киэн туттабыт! Истиҥник эҕэрдэлиибит, үөрэбит!
О.Д.Федорова аатынан киин библиотека коллектива