Нэһилиэкпитигэр Куорамыкы күөлүн үрдүгэр култуура сынньалаҥ паарката 2022 сыллаахха тутуллан үлэтин саҕалаабыта.
Айылҕа бэйэтэ анаан оҥорбутун курдук миэстэҕэ тутуллубут паарка эбэ бэйэтин аатынан Куорамыкы диэн ааттаммыта. Паарка иһигэр араас сынньанарга аналлаах тутуулары сэргэ аныгылыы сэргэх көрүҥнээх кыра дьиэ тутуллубута. Бу дьиэҕэ «КОППИ» диэн ааттаах кофейня арыллан ситиһиилээхтик үлэлии турар. 20 киһи киирэр сырдык ыраас, сылаас дьиэтигэр киирэн кофе араас көрүҥнэрин, тымныы, минньигэс утахтары, милкишейктары иһиэххин сөп.
Тэрилтэ хаһаайката Александра Ноговицына быһаччы көҕүлээһининэн, манна улахан дьоҥҥо, оҕолорго да анаан араас интэриэһинэй тэрээһиннэр ыытылла тураллара кэрэхсэбиллээх. Ол курдук, уһун өрөбүллэр күннэригэр оҕолорго «Арт-утренниктар» тэриллибиттэрэ. Онно улуус кылаабынай архитектора Лена Миронова уруһуйга маастар-кылаас ыытан оҕолор үөрүүлэрин үксэппитэ. Онтон улахан дьоҥҥо живописка маастар-кылаастаах «Арт-вечер» тэриллэн олус интэриэһинэйдик ааспыта.
Александра Александровна маннык тэрээһиннэр инникитин да булуохтара диэн эрэннэрэр . Мантан саас нэһилиэк дьаһалтата Куорамыкы күөлүгэр өссө хаҥкылыыр сир ыраастаан аһар былааннаах. Онон кофейняҕа сылдьааччы өссө элбиэ диэн эрэниллэр.
Георгий Степанов