Үөһээ Бүлүү улууһугар Улуу Кыайыы 80 сылыгар анаан оскуола оҕолоругар “Кыайыы волонтердара” тимуровскай хамсааһын үлэлэрэ ыытылла тураллар.
1940 сыллаахха А.П.Гайдар «Тимур и его команда» кинигэтэ тахсыаҕыттан дойдубутугар «тимуровскай» хамсааһыннар саҕаламмыттара. Үөрэнээччилэр тимуровскай этэрээттэрэ көмөҕө наадыйар дьоҥҥо үтүө баҕа санааларынан көмөлөһөн барбыттара. Бу хамсааһын күн бүгүн салҕанан бара турар.
Муус устар уонна ыам ыйдарыгар улуус оскуолаларын оҕолоругар — Кыайыы волонтердарыгар “Наше наследие” диэн аахсыйа биллэриллэн ыытылла турар. Бу аахсыйа чэрчитинэн Кыайыы пааматынньыктарын ыраастааһын, сөргүтүү уонна сэрии, үлэ, тыыл бэтэрээннэригэр, сэрии тулаайаҕын, анал байыаннай дьайыы кыттыылааҕын дьиэ кэргэттэригэр араас үлэнэн көмөлөһүү үлэлэрэ хас биирдии нэһилиэк оскуолаларыгар ыытылла тураллар.
Ол курдук, Мэйик сүрүн оскуолатын “Эрэл” оҕо хамсааһынын Кыайыы волонтердара (салайааччы Чириков Иван Петрович) анал байыаннай дьайыы кыттыылаахтарын Ивановтар, Семеновтар, Андреевтар дьиэ кэргэттэригэр хаардарын ыраастаан, таһан, муустарын дьаарыстаан үтүө үлэни ыытан, дьиэлээх хаһаайыттар махталлара улахан.
Тамалакаан орто оскуолатын Кыайыы волонтердара (салайааччы Юмшанова Ю.В.) муус устар 14 күнүгэр нэһилиэк ытык кырдьаҕаһыгар, 92 саастаах Анастасия Игнатьевна Николаеваҕа, тиэргэнин хаарын ыраастаан, таһан, халтараанын тойон, Эбээ Настаа үтүө санаалаах оҕолорго үөрүүтэ үгүс. Аҕам саастаах дьоҥҥо көмөлөһөн, киниттэн алгыс ылан, оҕолор астынан тарҕастылар.
Дьүөгэ Ааныстыырап аатынан Кэнтик орто оскуолатын Кыайыы волонтердара, учууталлара Аҕа дойду сэриитигэр кыттыыны ылбыт биир дойдулаахтарыгар анаммыт Кыайыы сквердарын хаарын ыраастааһыҥҥа улахан субуотунньугу тэрийдилэр.
Үөһээ Бүлүүтээҕи М.Т. Егоров аатынан орто оскуолаттан Кыайыы волонтердара анал байыаннай дьайыы кыттыылааҕын дьонугар Прокопьев Аркадий Николаевичка, элбэх оҕолоох Чычахова Чэмэлиинэ Николаевнаҕа хаардарын таһан, ис-тас үлэлэригэр көмөнү оҥордулар.
Бырааттыы Боескоровтар аатынан Сургуулук орто оскуолатын “Юные Бараховцы” оҕо хамсааһынын Кыайыы волонтердара (салайааччылара Сахая Егорова, Виктория Ефимова) нэһилиэктэрин аҕам саастаах ытык ыалларыгар Адамовтарга, Уйгуровтарга, Алексеевтарга уонна нэһилиэктэн 5 км.тэйиччи сытар Дьэбдьигийээн диэн сиргэ олорор Николай Ефимовка баран тиэргэнин хаарын таһан көмөлөстүлэр.
Н.А. Золотарев Боотулуу орто оскуолатын “Кэскил” оҕо хамсааһынын Кыайыы волонтердара нэһилиэктэрин пааматынньыктарын — 7 кыталыгы, геройдарга Албан аат, Кыайыы болуоссатын хаарын ыраастаатылар.
Дүллүкү орто оскуолатын “Радуга” оҕо хамсааһынын Кыайыы волонтердара анал байыаннай дьайыыга сылдьар дьоннордоох ыалларга буочукуларыгар муустарын таһан, хаалаан, оттук мас үлэтигэр уонна нэһилиэк бочуоттаах олохтооҕор Тимофеева Клара Даниловнаҕа хаар түһэрэн көмөлөстүлэр.
Бу курдук хас биирдии нэһилиэккэ, оскуолаҕа оҕо хамсааһыннарыгар муус устар уонна ыам ыйын устата Кыайыы волонтердарыгар “Наше наследие” диэн аахсыйа чэрчитинэн тимуровскай хамсааһыннар биллэриллэн, араас көрүҥнээх үлэ тиһигин быспакка ыытылла турар.
Быйыл бары билэрбит курдук, халыҥ хаар түһэн сир-дойду хаарынан туолла. Онон көмөҕө наадыйар ыаллар хас биирдии нэһилиэккэ бааллар. «Үлэ киһини киэргэтэр” диэн этиинэн сиэттэрэн, кыра сааһыттан амарах сүрэхтээх, кыраҕа-кыаммакка көмөлөһөр үтүө санаалаах, дойдуларын дьоннорун ытыктыыр, дьиҥ-чахчы дойдуга бэриниилээх ыччаттар бу маннык кыра да дьыалаттан саҕалаан иитиллэн тахсаллар. “Киһиэхэ кыра да наада” диэн этиинэн кыраны, кыамматы харыстыы, көмөлөһө сылдьыаххайыҥ диэн ыҥырабыт.
Оҕо хамсааһынын Кыайыы волонтердара ханнык да үлэттэн толлон турбакка ис санааларыттан көмөлөһөргө мэлдьи бэлэмнэр.
Саргылана Ильина, Үөһээ Бүлүүтээҕи “Тускул” оҕо киинин “Сомоҕо” оҕо хамсааһынын методиһа
«Үөһээ Бүлүү» хаһыат