Бүгүн, “Сэргэх” аҕам саастаах дьон кэпсэтэр, алтыһар кииннэригэр «Чэпчэтиилээх эминэн туһаныы» туһунан улуус кылаабынай бырааһын солбуйааччыта Мария Прокопьева иһитиннэрии оҥордо.
Мария Николаевна босхо эминэн хааччыйыыга федеральнай уонна муниципальнай бырагыраамалар үлэлииллэрин сиһилии кэпсээтэ.
-
Улуус үрдүнэн 1128 доруобуйатынан хааччахтаах дьон баарыттан 1051 киһи чэпчэтиинэн туһанар. Муниципальнай бырагырааманан доруобуйаларынан хааччахтаах дьон эрэ буолбакка, учуоттаахтар эмиэ туһаналлар. Онно астмалаах, артриттаах, глаукомалаах о.д.а. ыарыһахтар киирэллэр. Ону тэҥэ, онкология ыарыһахтарын эмиэ бу бырагыраамаҕа суруйабыт, холобур, кинилэр эмтэнэр биир куурустарын суумата 200 тыһ. солк. тэҥнэһэр. Онон сылга көрүллэр улахан дьоҥҥо 17 мөл. солк, оҕолорго көрүллэр 4 мөл. солк үгүс ыарыһах эмигэр-томугар тиийбэт. Быһа холоон биир киһиэхэ ыйга 1211 солк. көрүллэр. Былырыын босхо эмп харчыта муус устар ыйыгар бүппүтэ, биллэн турар, чэпчэтиигэ элбэх харчы көрүллүбэтин да иһин, от ыйыгар диэри эбии 3 мөл. солк көрүллүбүтэ.
Ону таһынан, Мария Николаевна инбэлииккэ тахсарга, ИПРА докумуонун оҥотторорго туох ирдэнэрин санатта:
-
Инбэлииккэ саҥа тахсарга Дьокуускай куоракка Медцентрга эбэтэр РБ-2 киинигэр обследование ааһан баран биирдэ биһиэхэ кэлэллэр, үс эрэ ый иһигэр ааһар болдьохтоохтор. Билигин көмөнөн туһанарга ИПРА докумуонун көрдүүллэр, ол суох буоллаҕына участковай терапевкытыгар тиийэн докумуону саҥаттаан оҥоттороҕут.
Итии чэйдээх, минньигэс астаах истиҥ иһирэх көрсүһүүгэ аҕам саастаахтар Мария Николаевналыын кэпсэттилэр, долгутар ыйытыктарыгар толору хоруйдары ылан астыннылар. Мария Николаевна кылгастык балыыһа сонуннарын билиһиннэрдэ:
-
Кулун тутар 3-14 күннэригэр РБ-2 балыыһа быраастара кэлэн варикоз, өттүк, мурун, үөскэ тааһы эпэрээссийэлии кэлэллэр. Билиҥҥиттэн суруттаран анаалыстары туттара сылдьаллар. Ону таһынан, 1 ыйга харах бырааһа дуогабар түһэрсэн үлэлии кэллэ уонна хирург быраастанныбыт. Нэһилиэктэргэ үлэлиир ФАП-тарга аптека пууна арыллан олохтоохтор махтаналлар. Быйыл ординатураларын бүтэрэр үс быраастаахпыт, ол курдук дерматолог, кардиолог, терапевт. Этэҥҥэ үөрэхтэрин бүтэрэн дойдуларыгар кэлэн үлэлииллэрин күүтэбит.
Быраастар кэлэн үлэлииллэригэр бары усулуобуйа барыта баар. Быйыл саҥа тутуллубут дьиэҕэ 3 муниципальнай квартира көрүллүбүтэ, өссө биир дьиэ тутуллан киирдэҕинэ 5 квартира ылыахпыт.
«Үөһээ Бүлүү» хаһыат