Сэтинньи, ахсынньы ыйдар устата Бүтүн Арассыыйатааҕы «Смотри, это Россия» видеооткрытка күрэҕэр Үөһээ Бүлүү улууһуттан барыта 13 хамаанда кыттыыны ылла. Хамаандаҕа 5 оҕо киирэр. Кыттааччылар сүһүөҕүнэн арахсан, төрөөбүт сирдэрин, историятын, үгэстэрин, улуу, чулуу дьоннорун билиһиннэрэр сыаллаах видео-открытка устан ыыппыттара. Аҥардас Саха сириттэн 523 үлэ куйаар ситиминэн киирэн, бастыҥ видео-открыткаларга куоластааһын ыытыллыбыта.
Күрэх түмүгүнэн Үөһээ Бүлүүтээҕи “Тускул” оҕо киинин иһинэн үлэлиир “Сомоҕо” оҕо хамсааһынын оҕолоро улахан сүһүөххэ кыайыылаах таҕыстылар (салайаччылара — Ильина С.Л., Николаева А.Г.). Ахсынньы 21 күнүгэр быһа эфирга регионнартан бастыҥнар ааттаннылар. Манна кыттыбыт оҕолор бары сыаналаах бириистэринэн наҕараадаланнылар. Бу күрэххэ “Сомоҕо” оҕо хамсааһына үһүс сылын кытталлар. Быйылгы видео-открытка Кировскай уобалас олохтоохторугар анаан уһулунна. Бу күрэххэ кыттарбытыгар видео-открыткабытын уһулбут, монтажтаабыт Адамов Александр Гаврильевичка, Үөһээ Бүлүүтээҕи 4 №-дээх орто оскуола 10 кылааһын салайааччытыгар, видеоролик сүрүн идеятын биэрбит Ильин Егор Васильевичка, хамаандаҕа кыттыбыт ҮөһээБүлүүтээҕи 4 №-дээх орто оскуола 10 кылааһын үөрэнээччилэрин төрөппүттэригэр, муус ылар “Кэлтэгэй” түөлбэтин хоһуун үлэһиттэригэр, буранын уларсыбыт эһээбитигэр Васильев Вадим Павловичка, эбээбитигэр Васильева Полина Владимировнаҕа минньигэс аһыгар, алгыстаах алаадьытыгар, саха балаҕанын уларсыбыт “Эйгэ” тэрилтэ директорыгар Платонова Мария Николаевнаҕа , суоппарбытыгар Шишигин Антон Владимировичка, Антонов Иннокентий Николаевичка, “Тускул” оҕо киинин директорыгар Иванова Марианна Ивановнаҕа биһиэхэ итэҕэйэн күүс-көмө, өйөбүл буолбуттарыгар улахан махталбытын тириэрдэбит. Сахабыт сирин, чуолаан төрөөбүт Үөһээ Бүлүүбүтүн киэҥ сиргэ сырдатан, куйаар ситимигэр элбэх куоластааһыны ылан, маннык улахан ситиһиини ыллыбыт. Биһиэхэ эрэнэн куоластаабыт Саха сирин, Үөһээ Бүлүү олохтоохторугар, выпускниктарбытыгар барыгытыгар Саргылаах Саҥа дьыл элбэх ситиһиилэри аҕаллын, дьиэ кэргэттэргитигэр иллээх-эйэлээх олоҕу баҕарабыт.
Галина Васильева
