Өрөспүүбүлүкэтээҕи үөрэх үлэһиттэрин атырдьах ыйынааҕы сүбэ мунньахтарын чэрчитинэн Дьокуускайдааҕы С.Ф. Гоголев аатынан педагогическай колледжка өрөспүүбүлүкэтээҕи педагогическай ярмарка буолла.
Ярмарка быйыл аан бастаан СР үөрэххэ уонна наукаҕа министиэристибэтин кадровай политикаҕа, государственнай сулууспаҕа үлэни тэрийии отделын уонна «Работа России» холбоһуктаах тэрээһиннэринэн буолла.
Өрөспүүбүлүкэ үрдүнэн үөрэх тэрилтэлэригэр 800-н тахса аһаҕас үлэ миэстэтэ баарын биллэрдилэр. Мантан биһиги улууспутугар билиҥҥи туругунан баар 90-ча вакансияҕа үлэһиттэри көрдөөтүбүт. Анал педагогическай үөрэҕи бүтэрбит үлэ көрдүүр эдэр дьон киин куоракка талаһаллара ыарахаттары үөскэтэр. Улууспут Баһылыга Николаев В. В. уонна улуустааҕы үөрэх салалтата, начальник Кынатов Ю. В. көҕүлээһиннэринэн, улуус киинин оскуолаларыгар математика учууталларыгар анаан биллэриллибит муниципальнай биир кэмнээх компенсационнай төлөбүрдээх үлэҕэ ылыы конкурсун үгүс киһи сэҥээрдэ, интэриэһиргээтэ. Маны таһынан, биирдиилээн предмети үөрэтэр анал идэлээх учууталлар кэлэн тус кэпсэттилэр, даннайдарын биэрдилэр, директордары кытта быһаччы кэпсэттилэр. Улуус үөрэҕин салалтатыгар, тэрилтэлэригэр саҥа сүүрээн киириитэ олохтоох нэһилиэнньэ үөрэхтээһинигэр саҥа сыһыаннары эрэйэр. Манна биллэн турар, сөптөөх каадырынан хааччыллыы сүрүн быһаарар оруоллаах буолуоҕа.
Улуустааҕы үөрэх салалтатын специалиһа Калиста Борисова