Бүгүн Кэнтик нэһилиэгэр 1925 с. аан маҥнайгытын ыытыллыбыт үлэһит дьахталлар 1-кы бүтүн Саха сиринээҕи сийиэстэрин 100 сыллаах бэлиэ даататын бэлиэтиир “Женщины Верхневилюйска – надежный тыл страны” конференция үрдүк таһымнаахтык буолла. Бу бэлиэ тэрээһиҥҥэ улууспут 17 нэһилиэгиттэн актыыбынай позициялаах дьахталлар кыттыыны ыллылар.
Конференция үөрүүлээх чааһыгар улуус баһылыгын бастакы солбуйааччыта Егор Иванов тэрээһин суолтатын бэлиэтээн, кэрэ аҥардарга махтал тылларын анаан туран улуус баһылыга Валерий Николаев Махтал суруктарын үлэҕэ, үөрэххэ, уопсастыбаннай олоххо көхтөөх дьахталларга туттартаата.
Улуус баһылыгын социальнай боппуруостарга солбуйааччы Анна Уларова билиҥҥи уустук кэмҥэ дьахтар оруола үрдүгүн, түмсүүлэр, биирдиилээн дьон көмөлөрүнэн байыаннай дьайыыга сылдьар уолаттарбытыгар көмө оҥоһулларын бэлиэтээтэ.
Улуустааҕы дьахталлар Сэбиэттэрин бэрэссэдээтэлэ Ольга Тумусова история быыһын сэгэтэн, үлэһит дьахталлар бастакы сийиэстэрин туһунан дакылаат оҥордо. 1925 с. буолбут сугулааҥҥа барыта 76 дэлэгээт кыттыбытыттан, аҥаара эрэ үөрэхтээх, ааҕар, суруйар дьоҕурдаах эбит. Бу сийиэскэ кыттыбыт дьахталлартан биирдэстэринэн Былатыан Ойуунускай ийэтэ Евдокия Ивановна Слепцова (Унарова) буолар. Сийиэс түмүгүнэн резолюция ылыныллыбыта, ол курдук кыыс оҕону 17 сааһын туолбутун кэннэ кэргэн биэрэргэ, үөрэхтэтэргэ, эр киһини кытары быраабы тэҥнииргэ о.д.а. атын этиниилэр киирбиттэрэ.
Президиумҥа Улуус баһылыгын социальнай боппуруостарга солбуйааччы Анна Уларова, улуустааҕы дьахталлар Сэбиэттэрин бэрэссэдээтэлэ Ольга Тумусова уонна “Дойдум тыына” иистэнэр сыах салайааччыта Васма Иванова үлэлээтилэр.
Салгыы араас тиэмэлэргэ дакылааттары иһиттибит. Ол курдук, Үөһээ Бүлүүтээҕи техникум устудьуона Вячеслав Васильев «Саха дьахталлара сэрии толоонугар», Нам нэһилиэгин библиотекатын сэбиэдиссэйэ Уруйдаана Саввинова “Дьахталлар тыылга үлэлэрэ”, Балаҕаннаах нэһилиэгин дьахталларын Сэбиэтин бэрэссэдээтэлэ Кэрэчээнэ Васильева “Кымыс киһи олоҕор оруола”, улуус уопсастыбаннай түмсүүлэрин координатора Ирина Потапова бэтэрээннэр спартакиадаларын, “Харысхал” НКО салайааччыта Зария Мойтохонова “Правовые аспекты и защиты прав детей с инвалидностью”, улуус дьахталларын сэбиэтин чилиэнэ Раиса Спиридонова “Миссия женщины через эмоциональне и интеллектуальное здоровье”, “Матери России” уопсастыбаннай хамсааһын чилиэнэ Людмила Долгунова “Резолюция 15-го съезда женщин Якутии” о.д.а. олус суолталаах, олоххо наадалаах дакылааттары кэпсээтилэр. Дакылаат истиитин быыһыгар физкультминутка уонна улуустааҕы психологическай киин психолога Вера Миронова тэрийиитинэн уйулҕа тренина буолла.
Конференция кэмигэр киирбит этиилэри учуоттаан, туһааннаах резолюция ылылынна.
Салгыы фойеҕа үлэһит дьахталларга аналлаах быыстапка, талба талааннаах бэйэ дьарыктаах кыргыттар атыы-эргиэн быыстапкалара турдулар. “Сделано в Верхневилюйске” бэйэ дьарыктаах дьахталлар түмсүүлэрин маастардара араас оҥоһуктарга маастар-кылаастары ыыттылар. Итиэннэ ким баҕалаах байыаннай дьайыыга уолаттарбытыгар барыахтаах сетканы өрөн бэйэтин сэмэй кылаатын ууруста.
Эбиэт кэнниттэн конференция дэлэгээттэрэ доҕордуу спорт күрэхтэһиитигэр күөн көрүстүлэр, сүүрэн-көтөн, оҕолуу оонньоон, дуоһуйа астынан тарҕастылар. Кэнтик талааннаах ыччата үҥкүүлээн, ыллаан чаҕылхай нүөмэрдэри бэлэхтээтилэр.
Мария Васильева,
«Үөһээ Бүлүү» хаһыат
Валентина Филиппова, Мария Васильева хаартыскаҕа түһэриилэрэ