Саха Өрөспүүбүлүкэтин Бырабыыталыстыбата ааспыт 2025 сыллааҕы үлэтин отчуоттуур иккис бөлөҕө Балаҕаннаах нэһилиэгин олохтоохторун кытары көрүстэ.
СӨ транспорт уонна суол хаһаайыстыбатын миниистирэ Владимир Сивцев ааспыт сылга туох үлэ барбытын туһунан кэпсээтэ. «Үлэ элбэх, сыал-сорук үгүс. Өссө да бииргэ үлэлиэххэйиҥ», — диэн ыҥырда.
СӨ мелиорациятын, сир оҥоруутун уонна үүннэриитин сайыннарыы департаменын салайааччы Вячеслав Владимирович Гаврильев тыа хаһаайыстыбатын боппуруостарыгар тохтоото. Былырыын Балаҕаннаахха 4 боппуруос киирбитин өссө төгүл санатан, бултааһыҥҥа, ыччаты тыа хаһаайыстыбатыгар сыһыарыыга, ГСМ льготалаах тарыыпка, о.д.а быһаарыылары биэрдэ.
Балаҕаннаах нэһилиэгин баһылыга Степан Дмитриев айан суолун өрөмүөнүгэр көмөлөһөллөрүгэр транспорт уонна суол хаһаайыстыбатын миниистирэ Владимир Михайловичтан көрдөстө. Айан суола ардах түстэ да алдьанарын, олохтоохтор харгыстары көрсөллөрүн бэлиэтээтэ. Итиэннэ дьаһалта үлэһитэ хамнаһа кыратын, онтон сылтаан ыччат муниципальнай сулууспаҕа сыстыбатын этиннэ.
Балаҕаннаах сүрүн оскуолатын дириэктэрэ Одунча Чаҥый оскуола үлэтин туһунан иһитиннэрдэ. Бу оскуола тыа хаһаайыстыбатынан ситиһиилээхтик дьарыктaнар, оҕолору тыа хаһаайыстыбатын үлэтигэр сыһыарар. «Юный коневод» диэн куруһуок үлэтин саҕалаабыта сэҥээриини тарта. Одунча Чаҥый иһитиннэриитин истэн баран, Владимир Михайлович тыа хаһаайыстыбатынан дьарыктанар оскуоланы өйүөххэ наадатын бэлиэтээтэ, тустаах уорганнарга этиитин тиэрдиэх буолла.
СӨ бырамыысыланнаһын уонна геологиятын миниистирин бастакы солбуйааччыта Михаил Афанасьевич ГСМ, солярка сыаната тоҕо үрдүү турарын сиһилии быһаарда. Ааспыт сылга 7 нефтеперерабатывающай собуоттар өрөмүөҥҥэ турбуттарын кэпсээтэ. Ол аҥара үөһэттэн дэлби тэптэрии түмүгүнэн. Онтон сылтаан бензин да сүтэ сылдьыбыттаах. Балаһыанньа уустук буолан, Уһук Илин регионугар нефтеперерабатывающай собуот тутуллуута сүрүн миэстэҕэ турар.
Степан Иванович: «Маннык ыарахан, уустук кэмҥэ Бырабыыталыстыба сөптөөхтүк үлэлии олорор диэн сыаналыыбын. Улуус баһылыга Валерий Николаев, Ил Дархаммыт Айсен Николаев тула мустан үлэлиэххэйиҥ-хамсыаххайыҥ!» — диэн ыҥырда.
Мария Васильева