Хоро нэһилиэгэр бырабыыталыстыба отчуотугар СӨ транспорт уонна суол хаһаайыстыбатын миниистирэ Владимир Сивцев салайар иккис бөлөҕө үлэлээтэ.
Отчуот иннинэ Владимир Михайлович Хоро үөрэҕэриитигэр сүҥкэн кылааттаах Иван Иванович Тарасовка «Үөһээ Бүлүү улууһун социальнай- экономическай сайдыытыгар кылаатын иһин» түөскэ кэтиллэр бэлиэни туттарда. Эҕэрдэлиибит!
Нэһилиэк баһылыга Альберт Иванов нэһилиэккэ долгутуулаах боппуруостары көтөхтө, ол курдук саҥа балыыһа тутуута, үп-харчы көрүллүүтэ, Октябрьскай суолу оҥоруу о.д.а
Хоро нэһилиэгин балыыһатыгар ыаллыы сытар нэһилиэктэртэн үгүс ыарыһах киирэн эмтэнэр. Балыыһа 11 койко-миэстэлээх буолан кыараҕас.
Олохтоохтор оскуола иннигэр видеокамера уонна федеральнай суолга, Хоро киириитигэр, сэрэтэр бэлиэлэри туруоралларыгар көрдөстүлэр. Маныаха Владимир Михайлович ГАИ-лары кытары кэпсэтэн суол бэлиэлэрин туруорарга үлэлэһиэххэ сөбүн бэлиэтээтэ. Оттон Октябрьскай суол өрөмүөнүгэр сайаапка ыыттахтарына, өйүөх буолла.
Хоро нэһилиэгин баһылыгынан үлэлии сылдьыбыт Семен Чиряев оскуола, балыыһа тутуллуутун туруоруста. Итиэннэ муниципальнай сулууспалаахтар хамнастара кыратын, сылгылаах киһиэхэ сокуон кытаанаҕын бэлиэтээтэ. Холобур, суолга сылгыны түҥнэри көттөхтөрүнэ, тоҕо сылгылаах киһи буруйдаах буоларый диэн ыйыталаста.
Салгыы «Обеспечение молодых семей жильем» бырагыраамаҕа уочаракка сылдьар соҕотох ийэ быйыл 36 сааһын туолбутунан, тоҕо уочараттан таһаардыгыт диэн ыйытыкка, улуус баһылыгын солбуйааччыта Егор Иванов толору хоруйу биэрдэ. Бырагыраамаҕа сурулларынан, 36 саастаах киһи эдэр ыал аатыттан тахсар, субсидияҕа хабыллыбат.
Итиэннэ умайбыт маһы хомуйарбыт тоҕо сатаммат диэн ыйыттылар. Онно Егор Дмитриевич умайан, тостон сытар маһы хомуйуохха сөбүн, онтон үүнэн турар ,аҥара умайбыт маһы Ойуур хаһаайыстыбатын тэрилтэтиттэн билиэт эрэ ылан хомулларын быһаарда. Маны сокуон ирдиир.
Хоро нэһилиэгин олохтооҕо Илья Ильич Саввинов уот тарыыба сылга иккитэ тоҕо үрдүүрүн, показание биэриитэ 5 эрэ хонуктааҕын, аны төлөбүргэ 10 эрэ хонук бэриллэрин, нэһилиэнньэ ыарырҕатарын туһунан этиннэ. «Уоту туспа төлүүбүт, ититэр ситими туһунан төлүүбүт. Холобур биһиги 6*6 дьиэбитигэр электроотоплениеҕа 10тыһ солк туттабыт», — диэн кэпсээтэ.
Маны таһынан ТКО, мелиоративнай үлэ, шлюз тутуута, «хаарбах дьиэттэн көһөрүү» бырагыраамата, эдэр специалистары олохсутуу боппуруостара көтөҕүлүннэ.
Хас биирдии этиилэри боротокуолга киллэрэн, тустаах дьоҥҥо тиэрдэн үлэлэһиэхпит диэн бөлөх салайааччыта Владимир Михайлович эттэ.
Мария Васильева