Олунньу 14 күнүгэр Д.С.Спиридонов аатынан Үөһээ Бүлүү улууһун гимназиятыгар «КҮН сарыала» тэрээһин ыытылынна.
Бу тэрээһиҥҥэ улууспут ыраах-чугас оскуолаларыттан: М.А.Алексеев аатынан өрөспүүбүлүкэтээҕи лиссиэй-интэринээт, И.Н.Барахов аатынан 1 #-дээх орто оскуола, М.Т.Егоров аатынан 2 #-дээх орто оскуола, Ю.Н.Прокопьев аатынан оҕо спортивнай оскуолата, Н.К.Седалищев — Дьүөгэ Ааныстыырап аатынан Кэнтик орто оскуолата, Н.А.Золотарев аатынан Боотулуу орто оскуолата, Тамалакаан орто оскуолата уонна Д.С.Спиридонов аатынан улуус гимназията, уопсайа 80-ча оҕо хабыллан күммүтүн бэккэ атаардыбыт.
КҮМмүт ыалдьыттары бэлиэтээһинтэн саҕаланна. Бэлиэтэммит оҕолор Аал Луук Мас түһүлгэҕэ тахсан тута билсиспитинэн, оонньообутунан бардылар. Ыҥырыылаах ыалдьыттар бары кэлбиттэрин кэннэ гимназиябытыгар норуот тылынан уус-уран айымньытын оҕолорго үөрэтэ, иҥэрэ сылдьар салайааччыбыт, Саха сирин биир биллэр Аан Дархан этээччитэ, Валентина Владимировна Семенова алгыһынан тэрээһиммитин арыйда.
Онтон оскуола аайыттан биирдии чаҕылхай оҕо тахсан, бары биир киһи курдук, «КҮН» дуоҕатын өрө көтөхтүлэр. Дьиэҕэ сорудах быһыытынан бэйэни билиһиннэриигэ И.Н.Барахов аатынан 1 #-дээх орто оскуола уолаттара кырыымпаҕа оонньоон баар дьону сөхтөрдүлэр. Д.С.Спиридонов аатынан улуустааҕы гимназияттан Афоня Петухов ырыа ыллаата, кыргыттар «Дьөһөгөй үҥкүүтүн» толордулар. Кылгас бэйэни билиһиннэрии кэнниттэн алта хамаандаҕа арахсан түһүлгэлээн оонньоотулар. Барыта алта араас халыыптаах сорудаҕы толордулар. Бу кэмҥэ салайааччыларга аналлаах төгүрүк остуол буолла. Манна улуустааҕы гимназия саха тылын уонна литературатын учуутала Герасим Александрович Егоров Саха сиринээҕи «КҮН» сайыҥҥы лааҕырын туһунан кэпсээтэ. Улуус «Ийэ тыл» түмсүүтүн сүрүннээччи Васильева Варвара Васильевна уонна улуус саха тылын уонна литэрэтиирэтин холбоһугун салайааччыта Терентьева Галина Васильевна төрөөбүт тыл билиҥҥи уустук кэмҥэ суолтатын быһааран биэрдилэр. Кэлбит ыалдьыттар, ону таһынан гимназиябытыгар оҕо хамсааһынын тэрийээччи Раиса Дмитриевна Спиридонова санааларын үллэһиннилэр. Ол кэннэ күнүскү чэй, КВИЗ оонньуу буолла. Оҕолор «Баҕа санаа дьааһыгар» сурук суруйан уктулар. «КҮН илдьитэ» истиэнэ хаһыатыгар бэйэлэрин ааттарын-суолларын, нүөмэрдэрин хааллардылар.
Кэлбит ыалдьыттары «Өттүк харалаах, илии тутуурдаах» ыыттыбыт. Хаартыскаҕа түһэн, үөрүүлээх быһыыга-майгыга КҮМмүт түмүктэннэ. Инникитин маннык тэрээһиннэри улууска элбэхтэ оҥоруохха, саха тылын сайдарыгар үлэлиэххэ диэн түмүккэ кэллибит.
Түгэнинэн туһанан улуустааҕы Үөрэх салалтатыгар, салайааччы Юрий Васильевич Кынатовка, улуус «Ийэ тыл» түмсүүтүгэр, саха тылын учууталларыгар уонна дириэктэр сүбэһиттэригэр, Д.С.Спиридонов аатынан улуус гимназиятын директорыгар Сергей Николаевич Кардашевскайга, гимназия үлэһиттэригэр, оҕолорго барҕа махталбытын тириэрдэбит.
«КҮН бытархайа» Д.С.Спиридонов аатынан улуус гимназиятын оҕолоро, саха тылын учууталлара: Чээнэ Анатольевна Лазарева, Герасим Александрович Егоров.