Үөдүгэй нэһилиэгэ төрүттэммитэ 255 сылын көрсө биир дойдулаахпыт, РФ суруналыыстарын Сойууһун чилиэнэ, Арассыыйа бэчээттээччилэрин Гильдиятын чилиэнэ, «Үөһээ Бүлүү» хаһыат редакторынан үлэлээбит талааннаах салайааччы, сытыы бөрүөлээх суруналыыс Степан Михайлович Иванов аатынан «Көмүс бөрүө» күрэх түмүгүн таһаарар тэрээһин Р. П. Матвеева аатынан Үөдүгэй библиотекатыгар буолла.
Бу тэрээһиҥҥэ биһиги хаһыаппыт редакциятыгар үлэлээбит Степан Михайлович доҕотторо, бииргэ улааппыт кылааһынньыктара, аймахтара, суруналыыстар кэлэн кини туһунан истиҥ ахтыыларынан үллэһиннилэр. Ону тэҥэ Степан Михайловичпыт 6 ыйыттан көрбүт сиэнэ, билигин Үөһээ Бүлүүтээҕи техникум МЧС салаатын устудьуона Дархан Тен ыалдьыттаата, оҕо сааһын сырдык өйдөбүлүнэн үллэһиннэ.
Степан Михайлович Иванову улууска билбэт киһи диэн суох. Төһө да Сунтаарга олохсуйан олорбутун иһин кини Үөһээ Бүлүү, төрөөбүт Үөдүгэйин туһугар мэлдьи ыалдьара, тугу эрэ саҥаны, сонуну айарын туһугар үлэлэһэрэ. Оннук да курдук кини дойдутугар төннөн оччотооҕу Үөһээ Бүлүүтээҕи лицейга, «Үөһээ Бүлүү» хаһыат редакциятыгар айымньылаахтык үлэлээбитэ. Төһө да аҕыйах кэмҥэ үлэлээтэр, кини редакция үлэтин туһунан кинигэ таһаартарбыта, благоустройство киллэттэрбитэ, хаһыаты нэдиэлэҕэ иккитэ бэчээттэтэр буолбута, улахан принтер атыыласпыта.
Степан Михайлович аатынан бастакы «Көмүс бөрүө» куонкуруска барыта 16 кыттааччыттан 20 үлэ киирдэ. Бу куонкурус тэриллэригэр үбүнэн-харчынан Үөдүгэй дьаһалтата, сынньалаҥ киинэ, суруналыыстар, «Үөдүгэй бөрүөтэ» түмсүү, Балаҕаннаах нэһилиэгин баһылыга Степан Дмитриев, бииргэ үөрэммит доҕотторо көмөлөстүлэр.
Барыта 5 хайысхаҕа үлэлэр киирдилэр. Дьүүллүүр сүбэ бэрэссэдээтэлинэн физико-математическай наука доктора Иван Шамаев үлэлээтэ. Кини эҕэрдэтин, хас биирдии үлэни ырыппытын Дьокуускайтан ыыппыт запиһыгар иһиттибит. Ол курдук, «Күннээх Күҥкү» тиэмэҕэ 1 м Н. П. Кардашевская — Куттаах, 2 м Мария Васильева.
«Үөдүгэй историята» — 1 м Варвара Васильева, 2 м Сардаана Васильева, 3 м Зинаида Стручкова,
«Үөдүгэй бастыҥ ыччата» хайысхаҕа 1 м Валентина Догоюсова, 2 м Мария Васильева,
«Үлэни өрө туппут Үөдүгэй киһитэ» — 1 м Марта Силигиянов, 2 м Валентина Догоюсова, 3 м Мария Михайлова,
«Степан Иванов туһунан…» — 1 м Степан Дмитриев, 2 м Мария Федотова.
» Кылаан чыпчаал Кыайыылаах» — Галина Васильева ааттанна! Кини Степан Михайлович дьиэ кэргэнин аатыттан харчынан бириэмийэни, статуэтканы тутта.
Талааннаах ыччаттар Лана Алексеева, Юлия Максимова, Тамалакаан кулуубун дириэктэрэ Михаил Серкан ылбаҕай ырыаларын бэлэхтээтилэр.
Инникитин Степан Михайлович туһунан ахтыы кинигэ тахсара буоллар диэн тэрээһин кыттыылаахтара баҕардылар. Түгэнинэн туһанан, убаастыыр редакторбыт тэрээһинин тэрийсибит бары дьоммутугар, спонсордарга, чуолаан Үөдүгэй библиотекатын үлэһиттэригэр, Валентина Петровна Филипповаҕа барҕа махталбытын тиэрдэбит! Үтүө киһи аата умнуллубат!
Мария Васильева
«Үөһээ Бүлүү» хаһыат