“Саха тыла сайдыан баҕарабын.
Сайдыа диэн эрэнэбин”
П.А.Ойуунускай
Биһиги, сахалар, былыр-былыргыттан оҕолоон-биэбэйдээн, чочуйан-тупсаран кэлбит барҕа баайбыт ийэ тылбыт буолар. Төрөөбүт тылынан саҥарар оҕо ийэ тыл илгэтин кытта олох тыынын ыймахтыыр, орто дойдуга олох олорорго күүс-уох иҥэринэр. Ийэ тыла оҕоҕо айылҕа араас кистэлэҥин ханнык да үөрэхтээх киһитээҕэр ордук толору быһаарар, дьон сэргэ сиэрин-майгытын, уопсастыба олоҕун-силигин, норуот историятын, бастыҥ баҕатын ханнык да историктааҕар ордук үчүгэйдик өйдөтөр, дириҥник арыйар.
Кэнники сылларга ийэ тылбыт эҥин эгэлгэтэ, этигэн кэрэтэ умнуллан, сүтэн симэлийэр туруктаах. Олохпут сайдар тэтимэ түргэн. Аныгы технология олохпутугар күүскэ киирдэ. Телефоннар, смартфоннар, планшеттар уо.д.а. олохпут “аргыстара” буоллулар. Төрөөбүт ийэ тылынан ааҕыы лаппа аҕыйаата.
Ол иһин Үөһээ Бүлүүтээҕи оҕо библиотеката 2023 сылтан куйаар ситимин нөҥүө төгүрүк сылы быһа “Сахалыы ааҕыахха” диэн күрэҕи ыытан, ааҕааччы киэҥ араҥата кыттыыны ылан, дьон сэҥээриитин ылбыта. Арассыыйа бэрэсидьиэнэ В.В.Путин ыйааҕынан 2024 с. дьиэ кэргэн сылынан биллэриллэн, күрэхпит “Дьиэ кэргэнинэн сахалыы ааҕыахха” диэн буолбута.
Кыттыбыт дьиэ кэргэттэр үксүлэрэ 5-6 оҕолоохторун чопчулаан бэлиэтиэххэ наада. Ону ааһан Үөһээ Бүлүү Намыттан 10 оҕолоох Обоевтар диэн эдэркээн ыал кытынна. Элбэх оҕолоох ыал көхтөөх позициялааҕа олус махталлаах суол. Бу ыаллар оҕолоругар кыра саастарыттан кинигэни сэргииргэ, сонурҕуурга үөрэтэллэр, ааҕыыны өрө туталлар. Өссө Ньурба улууһун Мэҥэдьэк нэһилиэгин Хатыы сэлиэнньэтигэр олорор төрөппүт көрүүтэ суох уонна тулаайах хаалбыт элбэх оҕолору иитэр Васильевтар приемнай дьиэ кэргэттэрэ кыттыбыттара олус үчүгэй. Төрөппүттэр бу иитэ ылбыт оҕолоро сайдалларыгар ордук болҕомто уураллара көстөр.
Кэлэр 2025 сылга тохсунньутан “Дьиэ кэргэнинэн сахалыы ааҕабыт” күрэх салгыы үлэлиирин биллэрэбит. Бу күрэххэ олорор сириттэн тутулуга суох ханнык баҕарар дьиэ кэргэн (оҕолоро үөрэнэр да, үлэһит да буолуохтарын сөп), эбээлэр, эһээлэр да кыттыахтарын сеп.
Күрэх ыйытыктара уонна ыйдааҕы түмүк сыл устата Үөһээ Бүлүүтээҕи оҕо библиотекатын сайтыгар тиһигин быспакка ый аайы тахсар. Ахсынньы ыйга уопсай түмүк биллэриллэр.
Оҕо библиотекатын сайта: db.vvlibr.ru
Күндү ааҕааччыларбыт! Ийэ тылбытынан ааҕан, төрөөбүт тылбыт баайын, этигэн кэрэтин, эгэлгэтин төгүрүк сылы быһа эппитигэр-хааммытыгар иҥэриэхпит, тылбыт саппааһын хаҥатыахпыт, элбэҕи билиэхпит-көрүөхпүт. Ылсыбыккытын ыһыктыбакка 12 ый бииргэ буолуохха!
Ааҕар киһи-билиилээх,
Билиилээх киһи-сайдыылаах,
Сайдыылаах киһи-ситиһиилээх!
Үөһээ Бүлүүтээҕи оҕо библиотеката