Ийэм миэхэ күн курдук,сырдыгынан эрэ сыдьаайан, күн бүгүҥҥэ диэри сылааһын биэрэ сылдьар саамай кэрэ киһим. Кыыс оҕо ийэтин үтүктэн, кинини холобур оҥостон, оннук буолуохтаах курдук ылынан олоҕун олорор эбит. Биһиги бииргэ төрөөбүттэр 5-пит,4 кыыс уонна биир уол . Оҕо сааһым Мэйик диэн кыракый дэриэбинэҕэ ааспыта. Төрөппүттэрим иккиэн Үөһээ Бүлүү Мэйик нэһилиэгин төрүт олохтоохторо. Аҕам Федоров Афанасий Афанасьевич, ийэм Федорова Светлана Васильевна иккиэн бэйэ-бэйэлэрин ситэрсэн биэрэр талааннаах дьон холбоһон ыал буолбуттар эбит.
Ийэлэр күннэригэр анааммын, кини туһунан дьоҥҥо-сэргэҕэ киэн туттан уонна махтанан туран сурук гынан суруйан кэпсиэхпин баҕарабын. Иҋэм Мэйик орто оскуолатыгар өр кэмнэргэ технология предметин үөрэтэ сылдьан, кыыс оҕону олоххо бэлэмниир, туһунан предмет наадатын өҋдөөн, кыргыттары иитэр суолталаах Кыыс Куо диэн программаны,онтон пособиены суруйан, бүтүн республика оскуолаларыгар предмет быһыытынан киллэрбитэ. Ийэм ханнык баҕарар дьыалатыгар бэриниилээхтик уонна хаачыстыбалаахтык ылсыһан, хайаан даҕаны дууһатын биэрэн туран, ис сүрэхтэн ылсыһан үлэлиирэ. Ийэбин билэр дьон ону эмиэ билэллэрэ. Ол курдук, умсугутуулаахтык, бэриниилээхтик уонна бокуойа суох үлэлиирин биһиги эмиэ көрө улааппыппыт. Онно барытыгар аҕабыт сүрдээх төһүү күүс, тирэх эрэ буолара. Мэйикпит оскуолатыгар республика араас муннуктарыттан уопут атастаһар сыаллаах семинардар, курстар ыытыллаллара. Үлэ күөстүү оргуйар буолара. Ону таһынан, төһө да дэриэбинэҕэ олордорбут, муода диэн тугун билэ улааппыппыт. Таҥнар таҥаска эрэ буолбакка, дьиэ тупсаҕай көстүүлээх буолуохтааҕын, минньигэс ас остуолга хайдах кэлэн кыраһыабайдык уурулларын ирдиирэ уонна кыраһыабай иһиттэргэ аһатара, ол иһин хас аһааһын аайы элбэх да иһит сууйарбыт. Дьиэбит уларыйбакка, наар биир кэм турарын ийэбит олох сөбүлээбэт, ол иһин биһиги дьиэбит штората уонна оһохпут испиэскэтэ нэдиэлэ аайы уларыйара, кырааскаланара.
Дьиэбитин сотору-сотору уларытарбыт. Аҕабыт уһанар буолан, ийэбит журналтан көрбүт миэбэлин уурбут-туппут курдук оҥорон кэбиһэрэ. Ол кэнниттэн дьүөгэлэрэ кэлэн көрөн бараллара, ону үтүктэн кэргэттэригэр хайаан да оҥорторбут, үтүктүбүт буолааччылар. Дьиэбитигэр «Бурда» диэн муодунай журнал куруук баар буолара, онтон көрөн, ийэм бэйэтигэр таҥас тиктээччи, толкуйдуур образтарын атаҕын таҥаһыттан саҕалаан, прическатыгар тиийэ толкуйдаан таһаарарын көрөр этибит. Онно аҕабыт эмиэ кыттыһаачы, батта5ын кырыйан, атаҕын таҥаһын кырааскалаан, эбэтэр соппуосканы олох тосту уларытан, ботильон оҥорон кэбиһээччи. Аҕабыт атах таҥаһын улларар буолан ону киһилээччитэ суох.
Биһиги кырабытыттан ийэбит тикпит таҥастарын кэтэн улааппыппыт, ол курдук, кыһыҥҥы соммутугар, бэргэһэбитигэр, унтуубутугар тиийэ тигэн таҥыннартыыра. Ийэбит хобулуктаах тууппулаларын кэтэ кэтэбит сиэркилэ иннигэр муода көрдөрөрбүт, кини кырааскаланарын, оҥосторун олох өҥөҋөн туран бүтүөр диэри көрөн турааччыбыт, онтон бүппүтүн кэнниттэн пудраланан, помадаланан киирэн барарбыт. Иҋэм биир кэрэ обраһа харахпар бу баар. Арай биирдэ, ыам ыйын ортото дуу, бүтүүтэ дуу бүтэһик уруоктар диэки кыргыттар буоламмыт перемена кэмигэр таһырдьа үктэлгэ сэлэһэ олордохпутуна, ийэм ыбылы киэргэнэн баран уруогун ыыта кэллэ. Мин көрдөхпүнэ, француженка курдук оҥостубут, биһиги бары кэпсэтэ олорон саҥабытыттан матан хааллыбыт. Оннук кыраһыабай буолан үлэтигэр кэллэ. Наһаа үчүгэй сиэрэй плаһын ыбылы курдаммыт, плаһын курдук өҥнөөх резиновай лодочкалаах, хара сетка колготкалаах, төбөтүгэр платоктаах. Ардах түһэ турар буолан, оччолорго кимиэхэ да суох курдары көстөр дьэрэкээн зонтиктаах,ол зонтига розовай тутаахтаах, ыйаастыгас тень, румяна, помада уонна «Шанель 5» духи сыттаах. Ити курдук кэрэҕэ уһуйбут, кэрэни бэйэтэ илдьэ сылдьар ийэлээхпиттэн мин олус диэн дьоллоохпун.
Эльвира Федорова,
урбаанньыт