Ытыктабыллаах Үөһээ Бүлүү улууһун олохтоохторо,
1941-1945 сс. Аҕа дойдуну көмүскүүр Улуу сэриигэ албан ааттаах Кыайыыны уһансыбыт тыыл бэтэрээннэрэ, сэрии сылларын оҕолоро!
Анал Байыаннай Дьайыы кыттыылаахтара!
Эһигини Үөһээ Бүлүү улууһун дьаһалтатын аатыттан уонна тус бэйэм Улуу Кыайыы албан ааттаах 81 сылынан эҕэрдэлиибин!
Кыайыы күнэ — модун Россия араас омуктарын бииргэ түмсүүлэрин, дойдуга бэриниилээх буолууларын ытык өйдөбүлүн, сэбиэскэй норуот булгуруйбат модун санаатын туоһута.
Кытыаста кыыһар Кыайыы Кыһыл Знамята — биһиги устуоруйабыт, бу биһиэхэ модун күүһү биэрэр тыын өйдөбүнньүкпүт.
1418 күн устата барбыт Аҕа дойдуну көмүскүүр Улуу сэриигэ Үөһээ Бүлүү улууһуттан оту-маһы тутан көрөр уолан саастарыгар сылдьар 2163 киһи барбыта. Олортон 1131 киһи сэрии толоонугар охтубута, 746 эрэ киһи этэҥҥэ тыыннаах эргиллибитэ, 298 киһи үлэ фронугар кыайыыны уһансыбыта.
Сэбиэскэй сэриилэр 1945 сыл муус устар 30 күнүгэр рейхстагы, ыам ыйын 2 күнүгэр Берлини толору ылбыттара, рейхстаг үрдүгэр разведчиктар Михаил Егоров, Мелитон Кантария Кыайыы Кыһыл Знамятын ыйаабыттара.
Модун Россия тутулун ыһаары өстөөх эмиэ төбөтүн өндөҥнөтөр, эйэни эһээри, күлүгүрдэр күннээх ыраас халлааны, көҥүлү күөйээри…Эһэлэрбит хааннара халтайга тохтубатаҕа, хаарыаннаах олохторо хааларга толук буолбатаҕа, фашизм иккистээн эргиллиэ суоҕа!
Төрөөбүт дойдуга бэриниилээх буолуу чаҕылхай холобурун күн бүгүн Аҕа дойду туһун көмүскэлигэр Анал байыаннай дьайыыга сылдьар уолаттарбыт көрдөрөллөр.
Махтанабыт… Сүгүрүйэбит… Аҕа дойдуну көмүскүүр Улуу сэрии, локальнай сэриилэр, күн бүгүн Украинаҕа буола турар Анал Байыаннай дьайыы бары кыттыылаахтарын албан ааттарыгар…
Киэн туттабыт Сэбиэскэй Сойуус Дьоруойдарын Миронов Алексей Афанасьевич, Лонгинов Владимир Дионисьевич, Аҕа дойду Улуу сэриитин I истиэпэннээх уордьаннаах Павлов Владимир Спиридонович, хамандыырын түөһүнэн хаххалаабыт Софронов Прокопий Афанасьевич-Боороо уонна Россия Дьоруойа Петров Алексей Рафаэлович-Медведь сырдык ааттарынан!
Күн бүгүн биһиги аттыбытыгар биир да уоттаах сэрии кыттыылааҕа суох… Бааллар бүгүн Кыайыыны уһансыбыт ытык дьоммут: эһэлэрбит, эбэлэрбит, тыыл бэтэрээннэрэ, сэрии сылларын оҕолоро. Кинилэр олохторун чэпчэтии, үтүө ааттарын үйэтитии, кинилэр кэс тылларын толоруу – ытык иэспит. “Ким да умнуллубат, туох да умнуллубат!”
Туругурдун Улуу Россия норуоттарын тулхадыйбат биир сомоҕо күүһэ!
Бары бииргэ түмсэн, урукку Кыайыы олугунан бүгүн эмиэ кыайыахпыт!
Кыайыы биһиэнэ буолуо! Туругурдун Улуу Кыайыы 81 сыла!
Ытыктабылы кытта
Үөһээ Бүлүү улууһун баһылыга В.Николаев