Ыам ыйын 5 күнүгэр Нам култууратын киинигэр Аҕа дойду сэриитин кыттыылааҕа, мелодист, самодеятельнай композитор Никифоров Георгий Максимович төрөөбүт күнүгэр аналлаах ахтыы -көрсүһүү ыытылынна.
Георгий Максимович төрүччүтүн олохтоох библиотека библиотекара Саввинова Уруйдаана Юрьевна кэпсээтэ. Кинигэ быыстапкатын көрдөрдө уонна Георгий Максимович туһунан хаһыакка тахсыбыт ыстатыйаларын, «Чолбон» сурунаалга тахсыбыт ыстатыйаны кыыһыгар туттарда. Георгий Максимович кыыһа Евдокия Георгиевна дьиэ кэргэн иһигэр аҕаларын туһунан наһаа истиҥник ахтан санаан ааста. Салгыы бэйэтин дьарыгын сиһилии кэпсээн кумааҕыттан кырыйыы композицияларын кэпсээтэ, анаан туруорбут быыстапкаларын сиһилии кэпсээтэ. Георгий Максимович 151 ырыа автора, Грант Григорян үөрэнээччитэ бэрт сырдык чаҕылхай олоҕун тула сүрдээх элбэх кэпсэтии буолла. Нам, Балаҕаннаах кулууптарыгар үрдүк таһаарыылаахтык үлэлээбитэ ахтылынна.
Хос сиэн уолаттар Дамир, Денис Никифоровтар Аҕа дойду сэриитин кыттыылаахтара хос эһэлэрин, хос хос эһэлэрин туһунан чинчийбит үлэлэрин сиһилии сырдаттылар. Нам нэһилиэгин баһылыга Кардашевскай А.И., Тобуруокап музейын үлэһитэ Саввинова Г.П., Тарасова Р.П.,Сидорова Л Н ахтан аастылар. Георгий Максимович ырыаларын сүгүрүйээччилэрэ Намыына түмсүү, Васильев С.Н., Кэнтиктэн Павлова -Михайлова Т В., Үөһээ Бүлүүттэн Романова Н.М. ырыаларын ыллаатылар. 1957с. «Көтөн тахсыҥ кыталыктар» ырыата Москваҕа Ыччат Аан Дойдутааҕы фестивалыгар ылламмыта да кини кыаҕын, талаанын көрдөрөр. Түмүккэ хос-хос сиэннэр 6 уонна 4 саастаах Алена, Оля Спиридоновалар «Эйэ, дьол иһин» диэн ырыатын тардан кэбистилэр. Тэрээһини салайан ыытта нэһилиэк кыраайы үөрэтээччилэрин түмсүүтүн кыттыылааҕа Саввинова Н.Р. Кэлбит дьон эһиил Г.М.Никифоров 100 сааһын тэрээһиннээхтик бэлиэтииргэ бигэ санааны ылынан астынан тарҕастылар.